HOPE...

Marahil nga’y kay sarap maidlip at ‘di na magising
Lalo’t sanlaksa ang hirap at sakit sa dibdib
Marahil nga’y kay sarap panawan ng bait kahit na sandali
Ng mamanhid ang puso sa hapdi at kirot dulot ng sari-saring isipin

Ang luha ay ‘di na mapatid
at ang bukas ay tila isa na namang
nakahahapo at mabigat na pasanin

Ngunit may sumpang binitiwan
na di ko kailanman ninasang talikuran
Batid ko ang magbata ang magtiis ay di maiiwasan
upang ang pangako Mo’y aking makamtan

Kaya’t sa tuwing tila umaandap na ang pag-asa
Sa malawak mong langit yaring ulo’y itinitingala
Alam kong mahahabag at lilingap ka Ama
Habang sa tuwina’y nanganganlong at may Pagtitiwala sa Iyo

Marahil nga’y ang lahat ng ito aking babaunin
ng marating ang langit Mong tahanan
na paraisong pinapangarap

Pagkat nais kang masilayan
Makapiling ka sa ligayang wagas
at ang hapis ay isa na lang nakalipas

Kaya’t sa tuwing tila umaandap na ang pag-asa
Sa malawak mong langit yaring ulo’y itinitingala
Alam kong mahahabag at lilingap ka Ama
Habang sa tuwina’y nanganganlong at may Pagtitiwala sa Iyo

Bawat pagluha ay aariing yaman
Bawat pait, saklap ay aariing tamis
Bawat alimura ay aariing puri
Bawat dusa’y yayakapin at ipagpapasalamat

Pagka’t sa tuwing tila umaandap na ang pag-asa
Sa malawak mong langit yaring ulo’y itinitingala
Alam kong mahahabag at lilingap ka Ama
Habang sa tuwina’y nanganganlong at may Pagtitiwala sa Iyo

Ikaw ang tanging nalalabing... PAG-ASA